| בַּמֶּ֣ה יְ֭זַכֶּה-נַּ֣עַר אֶת-אָרְח֑וֹ לִ֝שְׁמֹ֗ר כִּדְבָרֶֽךָ׃ | 9 |
| בְּכׇל-לִבִּ֥י דְרַשְׁתִּ֑יךָ אַל-תַּ֝שְׁגֵּ֗נִי מִמִּצְוֺתֶֽיךָ׃ | 10 |
| בְּלִבִּ֥י צָפַ֣נְתִּי אִמְרָתֶ֑ךָ לְמַ֗עַן לֹ֣א אֶֽחֱטָא-לָֽךְ׃ | 11 |
| בָּר֥וּךְ אַתָּ֗ה יְהֹ֫וָ֥ה לַמְּדֵ֥נִי חֻקֶּֽיךָ׃ | 12 |
| בִּשְׂפָתַ֥י סִפַּ֑רְתִּי כֹּ֝֗ל מִשְׁפְּטֵ֣י פִֽיךָ׃ | 13 |
| בְּדֶ֣רֶךְ עֵדְוֺתֶ֣יךָ שַׂ֭שְׂתִּי כְּעַ֥ל כׇּל-הֽוֹן׃ | 14 |
| בְּפִקֻּדֶ֥יךָ אָשִׂ֑יחָה וְ֝אַבִּ֗יטָה אֹרְחֹתֶֽיךָ׃ | 15 |
| בְּחֻקֹּתֶ֥יךָ אֶשְׁתַּעֲשָׁ֑ע לֹ֥א אֶ֝שְׁכַּ֗ח דְּבָרֶֽךָ׃ | 16 |